စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း ရခိုင်ပြည်နယ် စီမံကိန်းနှင့် ဘဏ္ဍာရေးလုပ်ငန်းများအား စစ်ဆေး

စီမံကိန်းနှင့် ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်းသည် ရခိုင်ပြည်နယ် တွင် အကောင်အထည်ဖော်ဆောင်ရွက်လျက်ရှိသည့် စီမံကိန်းနှင့် ဘဏ္ဍာရေးလုပ်ငန်းများအား စစ်ဆေးရန်နှင့် စီမံကိန်းနှင့် ဘဏ္ဍာရေးဝန်ကြီးဌာန လက်အောက်ရှိ ဝန်ထမ်းများနှင့် တွေ့ဆုံ၍ လုပ်ငန်းညှိနှိုင်းဆွေးနွေးရန်အတွက် ၅.၅.၂၀၂၁ ရက်နေ့၊ နံနက်တွင် နေပြည်တော်မှ လေယာဉ်ဖြင့် ထွက်ခွါရာ ရခိုင်ပြည်နယ် စစ်တွေမြို့သို့ မွန်းလွဲ (၁:၀၀) နာရီတွင် ရောက်ရှိပါသည်။
ထို့နောက် ယင်းနေ့၊ နေ့လည်ပိုင်းတွင် ရခိုင်ပြည်နယ်စီမံအုပ်ချုပ်ရေးကောင်စီ ဥက္ကဋ္ဌနှင့် အဖွဲ့ဝင်များအား တွေ့ဆုံ၍ အတူလိုက်ပါလာသည့် ဌာနအကြီးအကဲများနှင့် မိတ်ဆက်ပေးပြီး ခရီးစဉ်အကြောင်း ရှင်းလင်းတင်ပြခဲ့ကာ ပြည်နယ်ဥက္ကဋ္ဌ၏ လမ်းညွှန်ဆွေးနွေးမှုများကို မှတ်သား ပါသည်။ ထို့နောက် အကောက်ခွန်ဦးစီးဌာန၊ ပြည်တွင်းအခွန်များဦးစီးဌာနနှင့် ရသုံးမှန်းခြေငွေ စာရင်းဦးစီးဌာနတို့သို့ သွားရောက်စစ်ဆေးခဲ့ပြီး လိုအပ်သည်များ ညွှန်ကြားပါသည်။
၆.၅.၂၀၂၁ ရက်နေ့၊ နံနက်ပိုင်းတွင် ရခိုင်ပြည်နယ်စီမံအုပ်ချုပ်ရေးကောင်စီ အစည်းအဝေး ခန်းမ၌ ပြည်နယ်အတွင်းရှိ စီမံကိန်းနှင့် ဘဏ္ဍာရေးဝန်ကြီးဌာနမှ ပြည်နယ်တာဝန်ခံများ၊ အရာထမ်းများနှင့် အမှုထမ်းများကို တွေ့ဆုံပါသည်။ ပြည်နယ်တာဝန်ခံများက ဌာနအလိုက် လုပ်ငန်းဆောင်ရွက်မှုအခြေအနေများကို တင်ပြရာ ဒုတိယဝန်ကြီးက လိုအပ်သည်များကို လမ်းညွှန် မှာကြားပြီး ပေါင်းစပ်ညှိနှိုင်းဆောင်ရွက်ပေးပါသည်။ ထို့နောက် မြန်မာ့စီးပွားရေးဘဏ်နှင့် ပင်စင်ဦးစီးဌာန၊ နေ့လည်ပိုင်းတွင် မြန်မာ့လယ်ယာဖွံ့ဖြိုးရေးဘဏ်၊ စီမံကိန်းရေးဆွဲရေးဦးစီးဌာန နှင့် မြန်မာ့အာမခံလုပ်ငန်းရုံးများကို သွားရောက်စစ်ဆေးခဲ့ပါသည်။
ဒုတိယဝန်ကြီးသည် ၇.၅.၂၀၂၁ ရက်နေ့၊ နံနက်ပိုင်းတွင် ငွေရေးကြေးရေးကြီးကြပ်စစ်ဆေး ရေးဦးစီးဌာန၊ ဗဟိုစာရင်းအင်းအဖွဲ့တို့သို့ သွားရောက်စစ်ဆေးခဲ့ပြီး ရခိုင်ရိုးရာယက္ကန်းစက်ရုံသို့ သွားရောက်လေ့လာကြည့်ရှုခဲ့ရာ တာဝန်ရှိသူများက ရှင်းလင်းတင်ပြခဲ့ပါသည်။
ဒုတိယဝန်ကြီးသည် ခရီးစဉ်အတွင်း ဝန်ထမ်းများနှင့် တွေ့ဆုံရာတွင် နိုင်ငံတော်ဖွဲ့စည်းပုံ အခြေခံဥပဒေ အခန်း (၁၁) ပါ ပြဋ္ဌာန်းချက်များအရ နိုင်ငံတော်စီမံအုပ်ချုပ်ရေးကောင်စီက နိုင်ငံတော်တွင် အရေးပေါ်ကာလ သတ်မှတ်၍ ဆောင်ရွက်ခဲ့ရမှုအခြေအနေ၊ နိုင်ငံ့ဝန်ထမ်းများ ထားရှိရမည့် ယုံကြည်ချက်၊ ခံယူချက်၊ အစိုးရ၏ မူဝါဒများကို ထိရောက်စွာ အကောင်အထည်ဖော် ဆောင်ရွက်ရေး၊ စီမံကိန်းနှင့် ဘဏ္ဍာရေးဆိုင်ရာလုပ်ငန်းများတွင် ကြုံတွေ့နေရသည့် အခက်အခဲ များအပေါ် ဝိုင်းဝန်းကြိုးပမ်းဖြေရှင်းဆောင်ရွက်ရေး၊ COVID-19 ကပ်ရောဂါ ကူးစက်မှုမရှိစေရေး အတွက် အရှိန်အဟုန်မပျက် ဆက်လက်ကာကွယ်ထိန်းချုပ်သွားရေးနှင့် ဌာန/အဖွဲ့အစည်း လုံခြုံရေး ဆိုင်ရာကိစ္စရပ်များကို ဆွေးနွေးမှာကြားခဲ့ကြောင်း သတင်းရရှိပါသည်။